കൊച്ചി. വിനോദസഞ്ചാരികള്‍ക്കായി കേരളത്തിലെ ആദ്യ സ്വകാര്യ TOURISM TRAIN സർവീസിനൊരുങ്ങുന്നു. നാലു ദിവസം നീളുന്ന ആദ്യ പാക്കേജ് യാത്ര ജൂൺ 4ന് തിരുവനന്തപുരത്ത് നിന്നും ഗോവയിലേക്കു പുറപ്പെടും. ഗോവ, മുംബൈ, അയോധ്യ എന്നിവിടങ്ങളിലേക്കാണ് വിവിധ ടൂര്‍ പാക്കേജുകള്‍ ഒരുക്കിയിട്ടുള്ളത്. ചെന്നൈ ആസ്ഥാനമായ എസ്ആര്‍എംപിആര്‍ ഗ്രൂപ്പുമായി സഹകരിച്ച് കൊച്ചിയിലെ പ്രിന്‍സി വേള്‍ഡ് ട്രാവല്‍ ആണ് ഈ ടൂറിസം ട്രെയിൻ യാത്രാ പാക്കേജുകൾ ഒരുക്കിയിരിക്കുന്നത്.
750 പേര്‍ക്ക് യാത്ര ചെയ്യാവുന്ന ട്രെയിനില്‍ 2 സ്ലീപ്പര്‍ ക്ലാസ് ബോഗികള്‍, 11 തേര്‍ഡ് എ.സി, 2 സെക്കന്‍ഡ് എ.സി എന്നിവയുമുണ്ട്. മെഡിക്കല്‍ സ്റ്റാഫ് ഉള്‍പ്പെടെ 60 ജീവനക്കാരും ജീവനക്കാരും ട്രെയിനിലുണ്ടാകും. ടിക്കറ്റ് ബുക്ക് ചെയ്യുന്നവർക്ക് കൊല്ലം, കോട്ടയം, എറണാകുളം, തൃശൂര്‍, കോഴിക്കോട്, കണ്ണൂര്‍, കാസര്‍ഗോഡ്‌ എന്നിവിടങ്ങളില്‍ നിന്ന് കയറാം. അഞ്ച് വയസില്‍ താഴെയുള്ള കുട്ടികള്‍ക്ക് ടിക്കറ്റ് വേണ്ട. 10 വയസില്‍ താഴെയുള്ള കുട്ടികള്‍ക്ക് ടിക്കറ്റ് നിരക്കില്‍ 50 ശതമാനം ഇളവുണ്ട്. യാത്രികര്‍ക്ക് സൗജന്യ യാത്രാ ഇന്‍ഷുറന്‍സ് പരിരക്ഷയും ലഭിക്കും. പാരാമെഡിക്കല്‍ സ്റ്റാഫിന്റെ സേവനം ട്രെയിനിൽ ലഭ്യമാണ്. 24 മണിക്കൂറും പ്രവര്‍ത്തിക്കുന്ന എമര്‍ജന്‍സി റെസ്പോണ്‍സ് ടീം, ലാ കാര്‍ട്ടെ ഡൈനിംഗ്, ടൈലേര്‍ഡ് ബെഡ്ഡിംഗ്, ഓണ്‍ബോര്‍ഡ് ഫുഡ് ട്രോളി എന്നിവയും ഉണ്ടാകും.
ഗോവ
താമസം ഉള്‍പ്പെടെ നാലുദിവസത്തെ ഗോവന്‍ യാത്രയ്ക്ക് 2-ടിയര്‍ എ.സിയില്‍ 16,400 രൂപയാണ് നിരക്ക്. 3-ടിയര്‍ എ.സിയില്‍ 15,150 രൂപയും നോണ്‍ എ.സി സ്ലീപ്പറില്‍ 13,999 രുപയുമാണ് ഈടാക്കുന്നത്. ഗോവയിലെ പ്രീമിയം ഹോട്ടലുകളിലാണ് രണ്ടു ദിവസത്തെ താമസം ഒരുക്കിയിട്ടുള്ളത്. വിനോദസഞ്ചാരികള്‍ക്ക് മഡ്ഗാവില്‍ നഗരയാത്രയും ആസ്വദിക്കാം. കാസിനോകള്‍, ബോട്ട് ക്രൂയിസ് പാര്‍ട്ടികള്‍, ഡി ജെ പാര്‍ട്ടികള്‍, ഗോവന്‍ തെരുവുകളിലൂടെയുള്ള യാത്ര, ഭക്ഷണം എന്നിവയൊക്കെ ഇഷ്ടാനുസരണം ആസ്വദിക്കാം.
അയോധ്യ
8 ദിവസം നീണ്ടുനില്‍ക്കുന്ന അയോധ്യ യാത്രാ പാക്കേജ് നിരക്കുകൾ 37,150, 33,850, 30,550 രൂപ എന്നിങ്ങനെയാണ്. അയോധ്യ, വാരാണാസി, പ്രയാഗ്‌രാജ് എന്നിവിടങ്ങളിലെ പ്രശസ്തമായ ക്ഷേത്രങ്ങള്‍ ദര്‍ശിക്കാനും ഗംഗാ ആരതി കാണാനുമുള്ള സൗകര്യവും പാക്കേജിലുണ്ട്. ഭക്ഷണം വെജിറ്റേറിയന്‍ ആയിരിക്കും.
മുംബൈ
മുംബൈ യാത്രയ്ക്ക് ടു ടിയര്‍ എ.സിയില്‍ 18,825 രൂപയും ത്രീ ടിയറില്‍ 16,920 രൂപയും സ്ലീപ്പറില്‍ 15,050 രൂപയുമാണ് നിരക്ക്. ജൂണ്‍ മുതല്‍ എല്ലാ മാസവും ഓരോ ട്രിപ്പ് വീതം ഉണ്ടായിരിക്കും.
ബുക്കിങ്ങിന് 8089021114, 8089031114, 8089041114 എന്നീ നമ്പറുകളില്‍ ബന്ധപ്പെടാം.
