കോഴിക്കോട് അന്താരാഷ്ട്ര വിമാനത്താവളത്തില്‍ നിന്ന് മുംബൈയിലേക്ക് AIR INDIA EXPRESS നേരിട്ടുള്ള പ്രതിദിന സര്‍വീസ് ആരംഭിച്ചു. പുലര്‍ച്ചെ 1.10നു പറന്നുയരുന്ന വിമാനം 2.50ന് മുംബൈയില്‍ ഇറങ്ങും. മുംബൈയില്‍ നിന്ന് എല്ലാ ദിവസവും രാത്രി 10.50നാണ് സര്‍വീസ്. ഈ വിമാനം 12.40ന് കരിപ്പൂരിലിറങ്ങും. 5,133 രൂപ മുതലാണ് നിരക്കുകള്‍. യാത്രാ സമയം രണ്ട് മണിക്കൂറില്‍ താഴെ മാത്രമെ വരുന്നുള്ളൂ. ഫെബ്രവുരി 23നാണ് ഈ സര്‍വീസുകള്‍ ആരംഭിച്ചത്.
കോഴിക്കോട് നിന്ന് ബംഗളൂരുവിലേക്ക് കഴിഞ്ഞ മാസം എയര്‍ ഇന്ത്യ എക്‌സ്പ്രസ് നേരിട്ടുള്ള പ്രതിദിന സര്‍വീസ് ആരംഭിച്ചിരുന്നു. കൂടാതെ ചെന്നൈ, ദല്‍ഹി, കൊല്‍ക്കത്ത, ഭുവനേശ്വര്‍, അയോധ്യ തുടങ്ങി 19 ഇന്ത്യന്‍ നഗരങ്ങളിലേക്ക് എയര്‍ ഇന്ത്യ എക്‌സ്പ്രസ് വണ്‍-സ്റ്റോപ്പ് വിമാന സര്‍വീസുകളും നടത്തുന്നുണ്ട്.
ആഭ്യന്തര സര്‍വീസുകള്‍ക്കു പുറമെ ആഴ്ചയില്‍ 101 അന്താരാഷ്ട്ര സര്‍വീസുകളാണ് കോഴിക്കോട് നിന്ന് എയര്‍ ഇന്ത്യ എക്‌സ്പ്രസിനുള്ളത്. ഏറ്റവും കൂടുതല്‍ രാജ്യാന്തര സര്‍വീസുകളും കരിപ്പൂരില്‍ നിന്നാണ്. യുഎഇ, സൗദി അറേബ്യ, കുവൈത്ത്, ഒമാന്‍, ഖത്തര്‍, ബഹ്‌റൈന്‍ എന്നീ ഗള്‍ഫ് രാജ്യങ്ങളിലെ 15 നഗരങ്ങളിലേക്കാണ് നേരിട്ടുള്ള സര്‍വീസുകള്‍ നടത്തുന്നത്.
