കണ്ണൂര്‍. കണ്ണൂര്‍ രാജ്യാന്തര വിമാനത്താവളത്തില്‍ നിന്ന് AIR INDIA EXPRESS സൗദി അറേബ്യയിലെ ദമ്മാമിലേക്ക് വിമാന സര്‍വീസ് ആരംഭിക്കുന്നു. മേയ് രണ്ടു മുതലുള്ള യാത്രകൾക്ക് ബുക്കിങ് സ്വീകരിച്ചു തുടങ്ങി. വ്യാഴം, വെള്ളി, ശനി ദിവസങ്ങളിലാണ് സര്‍വീസുള്ളത്. എയര്‍ ഇന്ത്യ എക്‌സ്പ്രസിന്റെ പുതിയ സമ്മര്‍ ഷെഡ്യൂളിലാണ് ഈ സര്‍വീസ് ഉള്‍പ്പെടുത്തിയിരിക്കുന്നത്. കണ്ണൂരില്‍ നിന്ന് പുലര്‍ച്ചെ 5.15ന് പുറപ്പെടുന്ന വിമാനം സൗദി പ്രാദേശിക സമയം 7.30ന് ദമ്മാമിലിറങ്ങും. ദമ്മാമില്‍ നിന്ന് രാവിലെ 8.30ന് പുറപ്പെടുന്ന വിമാനം പ്രാദേശിക സമയം വൈകീട്ട് 3.45ന് കണ്ണൂരില്‍ ഇറങ്ങും. 4.45 മണിക്കൂറാണ് യാത്ര.
പ്രവര്‍ത്തനം നിലച്ച ഗോഫസ്റ്റ് നേരത്തെ കണ്ണൂര്‍-ദമ്മാം സര്‍വീസ് നടത്തിയിരുന്നു. ഈ സര്‍വീസ് ഇല്ലാതായതോടെ കണ്ണൂര്‍, കാസര്‍കോട്, കര്‍ണാടകയിലെ കുടക് ജില്ലകളില്‍ നിന്നുള്ള പ്രവാസികള്‍ കോഴിക്കോട് വിമാനത്താവളത്തെയാണ് പ്രധാനമായും ആശ്രയിച്ചിരുന്നത്. സൗദിയില്‍ അവധിക്കാലം അടുത്തത്തെത്തിയതോടെ ഈ സെക്ടറില്‍ എയര്‍ ഇന്ത്യ എക്‌സ്പ്രസ് സര്‍വീസ് ആരംഭിക്കുന്നത് വടക്കന്‍ മലബാറിലെ പ്രവാസികള്‍ക്ക് വലിയ ആശ്വാസമാകും.
